தக்காளி பருப்பு

தக்காளி பருப்பு வகையுடன் நீங்கள் மற்ற காய்கறிகளையும் உங்கள் தேவைக்கேற்ப சேர்த்து, இதைக் பதார்த்தமாகவும் சாப்பாட்டிற்கு வைத்துக்கொள்ளலாம் அல்லது குழம்பாகவும் வைத்து சாப்பாட்டில் சேர்த்துக் கொள்ளலாம். எப்படி செய்தாலும் இதன் சுவை அதிகமாக இருப்பதால், சாப்பாட்டை அதிகமாகவே சாப்பிடுவீர்கள்.

தேவையான பொருட்கள்:

தக்காளி - 1/4 கிலோ
துவரம்பருப்பு - 1/2 ஆழாக்கு
பச்சை மிளகாய் - 4
பூண்டு - 6 பல்
இஞ்சி - சிறிய துண்டு
காய்ந்த மிளகாய் - 2
வடகம் - சிறிதளவு
மஞ்சள் தூள் - 1/2 டீஸ்பூன்
மிளகாய்த் தூள் - 2 டீஸ்பூன்
பெருங்காயம் - 1/2 டீஸ்பூன்
முருங்கைக்காய் - 2
சாம்பார் வெங்காயம் - 8
உப்பு - தேவையான அளவு
எண்ணெய் - 1/2 குழிக்கரண்டி
நெய் (அ) வெண்ணெய் - 2 டீஸ்பூன்
செய்முறை:

* துவரம் பருப்புடன் பெருங்காயம், மஞ்சள் தூள் சேர்த்து வேக வைத்து மசித்து வையுங்கள்.

* தக்காளி, வெங்காயம், முருங்கைக்காயை வெட்டிக் கொள்ளுங்கள்.

* எண்ணெய் விட்டு காய்ந்ததும் வடகம், மிளகாய் வத்தல் போட்டுத் தாளித்துக் கொண்டு வெங்காயம், தக்காளியைப் போட்டு வதக்குங்கள்.

* இதில் அரிந்த இஞ்சி, பூண்டு, முருங்கைக்காய், மிளகாய்த் தூள், உப்பு சேர்த்து மீண்டும் வதக்குங்கள்.

* மசித்து வைத்திருக்கும் பருப்பை இதில் சேர்த்துக் கொதிக்க விடுங்கள்.

* பருப்பு கொதித்ததும் நெய் அல்லது வெண்ணெய் விட்டு இறக்குங்கள்.