குரோம் ஓ.எஸ். என் வழி தனி வழி--மெருகு பெறும் பயர்பாக்ஸ்--பாதுகாப்பான கம்ப்யூட்டிங் வழிகள்--எக்ஸெல் செல் செலக்ஷன்: புது வழிகள்--பைல்களை வாங்கிப் பாதுகாக்கும் “மீடியா பயர்’--உலக வரைபடத்தில் உங்கள் ஊரின் இடம், நேரம்--ஜஸ்ட் ரிலாக்ஸ்--எக்ஸெல் + கண்ட்ரோல் – எக்ஸெல் டிப்ஸ்… டிப்ஸ்…

குரோம் ஓ.எஸ். என் வழி தனி வழி

//
//

கம்ப்யூட்டர் பயன்பாட்டில் முற்றிலும் புதிய ஒரு திருப்பத்தை ஏற்படுத்தக் கூடிய திறன் கொண்ட ஆப்பரேட்டிங் சிஸ்டத்தினை கூகுள் “குரோம் “ என்ற பெயரில் சென்ற நவம்பர் 19ல் வெளியிட்டது. இதன் சோர்ஸ் கோட் எனப்படும் கட்டமைப்பு வரிகளை தன்னுடைய இணைய தளத்தில் கூகுள் வெளியிட்டுள்ளது. பொது மக்கள் பயன்பாட்டிற்கு இந்த ஆப்பரேட்டிங் சிஸ்டம் கிடைக்க இன்னும் ஓர் ஆண்டு ஆகலாம்.
ஆப்பரேட்டிங் சிஸ்டம் என்றவுடன் அது ஒரு டிவிடியில் வெளியிடப்படும் என்று எதிர்பார்த்த அனைவருக்கும், இதன் கட்டமைப்பு ஆச்சரியத்தை ஏற்படுத்தியுள்ளது. குரோம் ஆப்பரேட்டிங் சிஸ்டம் தனியாகக் கிடைக்காது. கம்ப்யூட்டர்களில், குறிப்பாக நெட்புக் கம்ப்யூட்டர்களில் பதிந்து கிடைக்கும். எப்படி மொபைல் போனில் நாம் ஆப்பரேட்டிங் சிஸ்டம் பதிக்காமல், அதில் பதிந்து வருவதனைப் பயன்படுத்துகிறோமோ, அதே போல குரோம் ஆப்பரேட்டிங் சிஸ்டம் பதிந்து வரும் கம்ப்யூட்டர்கள் விற்பனைக்கு வரும்.
இன்றைய கம்ப்யூட்டர் பயன்பாடு பெரும்பாலும் இன்டர்நெட்டைச் சார்ந்து இருப்பதனை உணர்ந்த கூகுள், வாடிக்கையாளர்களுக்கு அதன் வழியிலேயே முழு கம்ப்யூட்டர் பயன்பாட்டினையும் தரும் வகையில், குரோம் ஆப்பரேட்டிங் சிஸ்டத்தினை உருவாக்கியுள்ளது. இந்த சிஸ்டத்தை இயக்கியவுடன் இன்டர்நெட்டில் இணைந்து, உங்களுக்கு என்ன பயன்பாடு வேண்டும் என்கிற ஆப்ஷன் கேட்கப்படும். டாகுமெண்ட், ஸ்ப்ரெட்ஷீட், அனிமேஷன், இணைய தளம், ஆடியோ வீடியோ எடிட்டிங் இன்னும் பல செயல்பாடுகள் பட்டியலிடப்பட்டு நீங்கள் எது வேண்டுமோ அதனைத் தேர்ந்தெடுக்கலாம். அதற்கான அப்ளிகேஷன் சாப்ட்வேர் உங்களுக்குத் தரப்படும். நீங்கள் தேவையான பைல்களை உருவாக்கலாம். ஏற்கனவே உருவாக்கி இருப்பதனை எடிட் செய்திடலாம். பின் இவற்றை நீங்கள் விரும்பினால், கம்ப்யூட்டரில் உள்ள ஹார்ட் டிஸ்க், சிடி அல்லது பென் டிரைவில் பதிந்து சேவ் செய்து வைக்கலாம். இல்லை என்றால் குரோம் சிஸ்டம் மூலம் பெறும் ஆன்லைன் ஸ்டோரேஜ் வசதியைப் பயன்படுத்தி சேவ் செய்திடலாம். இதனால் உலகின் எந்த மூலையில் இருந்தாலும், குரோம் ஓ.எஸ். உள்ள ஒரு கம்ப்யூட்டர் மூலம் உங்கள் பைல்களை நீங்கள் எடிட் செய்திடலாம். உங்கள் கம்ப்யூட்டரில் இருந்து பைல்களைத் தயார் செய்தது போல அவற்றை உருவாக்கலாம்.
இதனால் அப்ளிகேஷன் சாப்ட்வேர் தொகுப்புகளை நீங்கள் விலை கொடுத்து வாங்கி உங்கள் கம்ப்யூட்டரில் பதிந்து வைக்கத் தேவையில்லை. எங்கே அவை கரப்ட் ஆகி, தக்க தருணத்தில் காலை வாரிவிடும் வகையில் கிராஷ் ஆகிவிடுமோ என்ற கவலை இல்லை. சேவ் செய்து வைக்க அதிகக் கொள்ளளவில் ஹார்ட் டிஸ்க் வாங்கிப் பொருத்த வேண்டியதில்லை. இவற்றை எல்லாம் குரோம் ஓ.எஸ். மூலம் பெற்றுக் கொள்ளலாம்.
இதனால் எப்போதாவது ஒரு முறை பயன்படுத்தக் கூடிய அப்ளிகேஷன் சாப்ட்வேர் தொகுப்புகளை, உங்கள் கம்ப்யூட்டரில் பதிந்து வைக்க வேண்டியதில்லை.
ஆன்லைனில் அனைத்தும் இயங்குவதால் வேகம், எளிமை, பாதுகாப்பு ஆகியன அடங்கியதாக நம் கம்ப்யூட்டர் அனுபவம் இருக்கும். குரோம் ஓ.எஸ். இயங்க 7 விநாடிகள் போதும். எதிர்காலத்தில் இந்த கால அவகாசம் இன்னும் குறையும்.
குரோம் ஓ.எஸ். முகப்பு தோற்றத்தில் குரோம் பிரவுசரைப் போலவே தோற்றமளிக்கும். கூகுள் அப்ளிகேஷன் சாப்ட்வேர் தொகுப்புகள் (டாகுமெண்ட்ஸ், ஸ்ப்ரெட்ஷிட், கிராபிக்ஸ் போன்றவை) அனைத்தும் தனித்தனி டேப்களில் தரப்பட்டிருக்கும். எது வேண்டுமோ அதற்கான டேப்பினைக் கிளிக் செய்து பயன்படுத்தலாம்.
நம்மிடம் உள்ள மெமரி கார்டு, மொபைல் போன், கேமரா ஆகியவற்றை கம்ப்யூட்டரில் இணைத்து அவற்றில் உள்ள படங்கள், ஆடியோ வீடியோ பைல்களைக் கம்ப்யூட்டர் பைல்களாக இயக்கலாம்.
இந்த ஆப்பரேட்டிங் சிஸ்டத்தை எப்படி வாங்கி இணைப்பது? தேவையே இல்லை. “குரோம் சிஸ்டம் பதிந்த கம்ப்யூட்டர்’ என்று மட்டுமே கேட்டு வாங்க முடியும். ஆப்பரேட்டிங் சிஸ்டம் தனியே கிடைக்காது. இதற்காகக் கம்ப்யூட்டர் தயாரிக்கும் நிறுவனங்களிடம் கூகுள் நிறுவனம் பேசி வருகிறது. முதலில் குரோம் ஓ.எஸ். பதிந்த நெட்புக் கம்ப்யூட்டர்கள் மட்டுமே கிடைக்கும். பின் லேப்டாப் கம்ப்யூட்டர் மற்றும் டெஸ்க் டாப் கம்ப்யூட்டர் கிடைக்கும். தற்போது டெஸ்க் டாப் கம்ப்யூட்டர் இடத்தில் லேப் டாப் கம்ப்யூட்டர்களும், லேப் டாப் இடத்தில் நெட்புக் கம்ப்யூட்டர்களும் இடம் பிடித்து மக்களிடையே பரவி வருகின்றன. எனவே தான் குரோம் ஓ.எஸ். முதலில் நெட்புக் கம்ப்யூட்டர்களில் தரப்பட இருக்கிறது.
இப்போது கம்ப்யூட்டரில் பயன்படுத்தப்படும் விண்டோஸ், மேக் ஆப்பரேட்டிங் சிஸ்டங்கள் எல்லாம் இணையம் பயன்பாட்டில் இல்லாத காலத்தில் தொடங்கப்பட்டு, மேம்படுத்தப்பட்டு கிடைப்பவை. இப்போது எல்லாமே இன்டர்நெட் என்று ஆகிவிட்ட நிலையில், அதனை அடிப்படையாகக் கொண்டு ஆப்பரேட்டிங் சிஸ்டத்தை உருவாக்க வேண்டும் என கூகுள் திட்டமிட்டு, குரோம் ஆப்பரேட்டிங் சிஸ்டத்தை வடிவமைத்துள்ளது.
மக்கள் தங்கள் கம்ப்யூட்டரில் எல்லாமே உடனே கிடைக்க வேண்டும் என எண்ணுகின்றனர். இமெயில் பார்க்க வேண்டும் எனில், ஆப்பரேட்டிங் சிஸ்டத்தை இயக்கி, பிரவுசர் அல்லது இமெயில் கிளையண்ட் புரோகிராமை இயக்கி, இணைய தளத்தை அணுகி என அதிக நேரம் செலவழித்த பின்னரே இமெயிலைப் பெறுகின்றனர். இந்த தடைகற்களை நீக்கி வேகமாக இமெயிலைப் பெற்றுத் தருகிறது குரோம் ஓ.எஸ்.
வழக்கமான கம்ப்யூட்டர் பயன்பாட்டிலிருந்து, முற்றிலும் மாறுதல்களுடன், கவலையற்ற, அதி வேகமான, எளிதான கம்ப்யூட்டர் பயன்பாட்டினைத் தர இருக்கிறது குரோம் ஓ.எஸ். இந்த ஓ.எஸ். இப்போது பயன்பாட்டில் இருக்கும் கம்ப்யூட்டர்களுக்கும் அவற்றில் இயங்கும் ஆப்பரேட்டிங் சிஸ்டங்களுக்கும் மாற்றானது அல்ல. இதன் வழி தனி வழி.
எச்.பி., ஏசர், அடோப், லெனோவா, குவால்காம், டெக்ஸாஸ் இன்ஸ்ட்ருமெண்ட்ஸ், ப்ரீ ஸ்கேல், இன்டெல் ஆகியவை இந்த ஆப்பரேட்டிங் சிஸ்டத்துடன் இணைந்து செயல்பட ஒத்துக் கொண்டுள்ளதாக தெரிவிக்கப்பட்டுள்ளது.
பில்கேட்ஸ் இது பற்றிக் குறிப்பிடுகையில் குரோம் ஓ.எஸ். லினக்ஸ் சிஸ்டத்தின் இன்னொரு வடிவம் போல இருக்கிறது. இதன் இயக்கம் குறித்து குறைந்த தகவல்களே வந்திருப்பதால், அது என்ன செய்திடும் என்று அறிய ஆர்வம் அதிகரிக்கிறது என்றார். குரோம் ஓ.எஸ். இலவசமா? என்ற கேள்விக்கு கூகுள் இன்னும் விடையளிக்கவில்லை. ஓப்பன் சோர்ஸ் அடிப்படையில் இயங்குவதால் இலவசமாக அல்லது மிக மிகக் குறைந்த விலையில் இது கிடைக்கலாம். இதனால் அதிக விலை கொடுத்து வாங்கப்படும் விண்டோஸ் சிஸ்டத்திலிருந்து மக்கள் இதற்கு மாறலாம்.
குரோம் ஓ.எஸ். இலவசமாகத் தரப்படும் நிலையில், நிச்சயமாக அதில் விளம்பரங்கள் இடம் பெறலாம். குரோம் ஓ.எஸ். ஓப்பன் சோர்ஸ் அடிப்படையில் உருவானதால், இந்த ஆப்பரேட்டிங் சிஸ்டத்திற்கு அதிகமான எண்ணிக்கையில் தர்ட் பார்ட்டி அப்ளிகேஷன்கள் உருவாக்கப்பட்டு இலவசமாகக் கிடைக்கும் என்று எதிர்பார்க்கப் படுகிறது.
அடுத்த ஆண்டில் குரோம் ஓ.எஸ். கம்ப்யூட்டர்கள் மிகச் சிறிய அளவில், சிறிய ஸ்கிரீன், டச் பேட், கீ போர்டு ஆகியவற்றுடன் கிளாம் ஷெல் கம்ப்யூட்டர்களாக வெளிவரலாம்.
குரோம் ஓ.எஸ். வழக்கமான ஹார்ட் டிஸ்க்குகளுக்குப் பதிலாக சாலிட் ஸ்டேட் டிஸ்க்குகளையே சப்போர்ட் செய்திடும். இதனால் மின்சக்தி குறைந்த அளவே பயன்படுத்தப்படும்; வேகம் அதிகரிக்கும்.
இயக்க வேகம் மிக மிகக் குறைந்த அளவில் இருக்கும். ஒரு பட்டனை அழுத்தியவுடன், கம்ப்யூட்டர் தயாராகி உங்களை இணையத்தில் இடம் பெறச் செய்திடும் குரோம் ஓ.எஸ்.
அனைத்துமே வெப் அடிப்படையிலான அப்ளிகேஷன் களாக இருப்பதால், நாம் எந்த சாப்ட்வேர் தொகுப்பையும் இன்ஸ்டால் செய்து, அப்டேட் செய்து பராமரிக்க வேண்டியதில்லை.
மைக்ரோசாப்ட் நிறுவனத்தைப் பொறுத்தவரை டெஸ்க்டாப் கம்ப்யூட்டர் களுக்கான ஆப்பரேட்டிங் சிஸ்டம் தருவதில் நிலையான முதல் இடத்தைப் பெற்றுள்ளது. ஆனால் டெஸ்க்டாப் கம்ப்யூட்டர் பயன்பாடு குறைந்து வருகிறதே. அந்த இடத்தில் லேப்டாப் மற்றும் நெட்புக் கம்ப்யூட்டர்கள் கைப்பற்றி வருகின்றன. எனவே தான் கூகுள் நெட் டாப் கம்ப்யூட்டர்களில் தன் ஓ.எஸ். பயணத்தைத் தொடங்கியுள்ளது. இதன் மூலம் டெஸ்க்டாப் பழக்கத்தை மூடிவிட கூகுள் திட்டமிடுகிறது.

குரோம் ஓ.எஸ். குறித்து சுருக்கமாகச் சொல்வதென்றால்,
1. வெப் பிரவுசர் இங்கே டெஸ்க் டாப் கம்ப்யூட்டராகச் செயல்பட உள்ளது. எல்லாமே இணையதளத்துடன் கூடிய தொடர்பாகவே அமையும்.
2. வழக்கமான பைல், போல்டர், டிரைவ் எல்லாம் இருக்காது. எல்லாமே இணையத்தில் சேர்த்து வைக்கப்படும்.
3. குரோம் ஓ.எஸ். உள்ள கம்ப்யூட்டரில் ஷட் டவுண் பட்டன் இருக்காது. ஸ்லீப் மோடில் தான் இருக்கும். எனவே தொட்டவுடன் இயங்கத் தொடங்கி இணையத்தில் உங்களை அமர வைக்கும்.
4. கம்ப்யூட்டரில் எந்த சாப்ட்வேருக்கும் அப்டேட் தேவையில்லை. எல்லா அப்ளிகேஷனும் இணையத்திலிருந்தே நமக்குத் தரப்படுவதால், அப்போது தயாராக அப்டேட் செய்யப்பட்டுள்ள சாப்ட்வேர் தொகுப்புதான் பயன்படுத்தக் கிடைக்கும்.
5. எதுவுமே கம்ப்யூட்டரில் ஸ்டோர் செய்யப்படமாட்டாது. எனவே வைரஸ் தாக்கி கெடுக்கும் என்ற சந்தேகத்திற்கு இடமே இல்லை. அதிக பாதுகாப்பான, கவலையற்ற கம்ப்யூட்டிங் சுகம் கிடைக்கும்.

மெருகு பெறும் பயர்பாக்ஸ்

தொடர்ந்து அதிக வாடிக்கையாளர்களைக் கவர்ந்து, இன்டர்நெட் எக்ஸ்புளோரர் தொகுப்பிற்கு போட்டியாக இயங்கும் பயர்பாக்ஸ் பிரவுசர், பல புதிய வழிகளில் மேம்பாடு அடைய உள்ளது. மொஸில்லா தன் இணைய தளத்தில் இதனைத் தெரிவித்துள்ளது.
இந்த மாற்றங்கள் இரண்டு நிலைகளில் ஏற்படுத்தப் படும். முதல் நிலை மாற்றங்கள் பயர்பாக்ஸ் பதிப்பு 3.7ல் அடுத்த ஆண்டின் தொடக்கத்தில் தரப்படும். மற்ற மாற்றங்கள் அனைத்தும் பயர்பாக்ஸ் தொகுப்பு 4ல் ஏற்படுத்தப்படும்.
பிரவுசர்களுக்கிடையேயான போட்டியில் தன் பயர்பாக்ஸ் நல்லதொரு இடத்தைப் பிடித்து வருவதனை மொஸில்லா நன்கு உணர்ந்துள்ளது. எனவே தான் எந்தவித ஆரவாரமும் ஆர்ப்பாட்டமும் இன்றி பல வசதிகளைத் தொடர்ந்து சேர்த்து வழங்கி வருகிறது.
தற்போதைய பயர்பாக்ஸ் முகப்பு தோற்றம் மிகப் பழமையாக இருப்பதாக மொஸில்லா எண்ணுகிறது. முகப்பு தோற்றத்தில், விஸ்டா தொகுப்பில் வந்த கிளாஸ் ஸ்டைலில் முதல் மாற்றம் இருக்கும் Page மற்றும் Tools என இரண்டு பிரிவுகள் மட்டுமே உள்ளதாக மெனு மாற்றி அமைக்கப்படும். Stop மற்றும் Reload ஆகிய இரண்டும் ஒரே பட்டனில் தரப்படும். மெனு பார் மறைக்கப்பட்டு ரிப்பன் ஸ்டைல் மெனு தரப்படும் என முன்பு அறிவித்தபோது பலத்த எதிர்ப்பு இருந்ததால், அதனைக் கைவிட்டுவிட்டது மொஸில்லா.
அட்ரஸ் பார் மற்றும் சர்ச் பார் ஒரே கட்டத்தில் தரப்படும். ஸ்டேட்டஸ் பார் எடுக்கப்படும். இவை எல்லாம் குரோம் பிரவுசர் போல தோற்றத்தைத் தருவதற்கான முயற்சிகள் என்று சிலர் கூறிய போது, மொஸில்லா அதனை வன்மையாக மறுத்து பயர்பாக்ஸ் எப்போதும் பயர்பாக்ஸ் போலத்தான் தோற்றமளிக்கும் எனக் கூறப்பட்டது.
அனைத்து பிரவுசர்களும் ஒரே மாதிரியான வேலையை மேற்கொள்வதால், சில வேளைகளில் இவை ஒன்றுக்கொன்று மற்றதைக் காப்பி செய்வது போலத் தோன்றுவதைத் தவிர்க்க முடியாது. ஆனாலும் ஒவ்வொரு பிரவுசரும் தனக்கென்று ஒரு தனித் தோற்றத்தைக் கொண்டுள்ளதை மறுக்க முடியாது.
பிரவுசர்களுக்கிடையே ஏற்பட்டுள்ள போட்டியில், இன்னும் இன்டர்நெட் தான் முதல் இடத்தில் உள்ளது. ஆனால் இன்டர்நெட் எக்ஸ்புளோரர் பதிப்பு 6ஐப் பயன்படுத்தும் வாடிக்கையாளர்களின் எண்ணிக்கை யைக் காட்டிலும் கூடுதலானவர்கள் பயர்பாக்ஸினைப் பயன்படுத்துகின்றனர்.
இன்டர்நெட் எக்ஸ்புளோரர் பயன்படுத்துவதை விட்டுவிட்டு, பலர் பயர்பாக்ஸ் பிரவுசருக்குத் தாவியதற்கு முக்கிய காரணம், இன்டர்நெட் எக்ஸ்புளோரரில் பல இடங்கள் ஹேக்கர்களுக்குச் சாதகமாக இருந்ததுதான். ஆனால் நிலைமை இப்போது தலைகீழாக மாறியுள்ளது. இணைய பாதுகாப்பு குறித்து ஆய்வு செய்திடும் ஸென்ஸிக் என்ற அமைப்பு அண்மையில் நடத்திய ஆய்வில், பயர்பாக்ஸ் பிரவுசர் தான் ஹேக்கர்கள் காணும் பலவீனமான இடங்களைக் கொண்டிருப்பதில் முதல் இடம் பெற்றுள்ளது என்பது தெரியவந்துள்ளது. இதன் பாதுகாப்பற்ற தன்மை 44 சதவீதம், சபாரி 35சதவீதம் மற்றும் இன்டர்நெட் எக்ஸ்புளோரர் 15சதவீதம் என அறிவித்துள்ளனர். இந்த ஆய்வின் நம்பகத் தன்மை இப்போது கேள்விக் குறியாகி இருந்தாலும், பயர்பாக்ஸ் ஏற்றுக் கொள்ளும் ப்ளக் இன் புரோகிராம்கள்தான் இந்த பாதுகாப்பற்ற தன்மையினைத் தருவதாக தெரியவந்துள்ளது. ஆனால், பயர்பாக்ஸ் உடனே தன் பிரவுசரில் இருந்த பலவீனமான இடங்களைச் சரி செய்துவிட்டது.

பயர்பாக்ஸ் 3.6 பீட்டா 2
பயர்பாக்ஸ் வாடிக்கையாளர்கள், இதன் பதிப்பு 3.5 னைத்தான் அதிகமாகப் பயன்படுத்து கின்றனர் என்றாலும், பலரும் ரிஸ்க் எடுத்து பயர்பாக்ஸ் 3.6 சோதனைத் தொகுப்பினையும் பயன்படுத்தி வருகின்றனர். இவர்களுக்கான சோதனைத் தொகுப்பு 2 அண்மையில் வெளியிடப்பட்டது. அதில் 190 பிரச்னைகள் சரி செய்யப்பட்டதாக அறிவிக்கப் பட்டுள்ளது.
சென்ற வாரம் வெளியான பயர்பாக்ஸ் 3.6 சோதனை பதிப்பு, விண்டோஸ் 7 ஆப்பரேட்டிங் சிஸ்டம் தரும் சில புதிய வசதிகளுக்கு இணைந்து வடிவமைக்கப் பட்டுள்ளது. ஏரோ பீக், டாஸ்க்பார் தம்ப்நெயில் பிரிவியூ போன்றவற்றை இதற்கு எடுத்துக் காட்டுக்களாகக் கூறலாம். ஆனால் விண்டோஸ் 7 தரும் ஜம்ப் லிஸ்ட்டின் வசதிகள் பயர்பாக்ஸ் பதிப்பில் இல்லை.
குறிப்பாக இதனுடன் இயங்க முடியாமல் இருக்கும் சாப்ட்வேர் புரோகிராம்களால், பயர்பாக்ஸ் கிராஷ் ஆவது தடுக்கப்பட்டுள்ளது.
பிரவுசரின் தோற்றத்தினை பயன்படுத்துபவர்கள் எளிதில் மாற்ற பெர்சனா என்ற டூலை மொஸில்லா வழங்கியது. இந்த தொகுப்பில் இன்னும் பல ஸ்கின்கள் தரப்பட்டுள்ளன. இப்போது பெர்சனாவில் ஒரே கிளிக் செய்வதன் மூலம் பயர்பாக்ஸ் தோற்றத்தினை மாற்றுவதற்கு வழி தரப்பட்டுள்ளது. வீடியோக்களை இயக்குகையில் முழு திரையிலும் பார்க்க வழி அமைக்கப்பட்டுள்ளது. இதனைப் பயன்படுத்து பவர்களுக்கு, பழசாகிப் போன, பயன்படுத்த முடியாத ப்ளக் இன் புரோகிராம்கள் குறித்த அறிவிப்பு வழங்கப்படுகிறது. ஆட் ஆன் தொகுப்புகள் புதிய பிரவுசர் தொகுப்பிற்கு ஏற்றவைதானா என்று அறிய ஆட் ஆன் கம்பாடிபிளிட்டி ரீடர் என்னும் புரோகிராம் டவுண்லோட் செய்து பயன்படுத்தும் வகையில் தரப்படுகிறது.
கம்ப்யூட்டரிலிருந்து பைலை பிரவுசரின் அட்ரஸ் பாரில் போட்டு திறக்க வழி செய்யப்பட்டுள்ளது.
மொஸில்லா என்ன செய்ய வேண்டும் என்பதனை கூகுள் தந்த குரோம் பிரவுசர் சுட்டிக் காட்டியது. அதே போல குரோம் பிரவுசரில் இருந்த புதிய வசதிகளை பயர்பாக்ஸ் தரத் தொடங்கியது. பிரவுசர் யுத்தத்தில் பயர்பாக்ஸ், குரோம் பிரவுசரை எதிர் கொண்டாலும், ஓப்பன் சோர்ஸ் அமைப்பில் இரண்டும் ஒரே மாதிரியான செயல்பாட்டினையே மேற்கொண்டுள் ளன என்பது குறிப்பிடத்தக்கது. எச்.டி.எம்.எல். வசதியை புரோகிராமிங் மற்றும் டிஸ்பிளேவுக்கான வலிமையான சாதனமாகக் கொண்டு வருவதில் இரண்டும் செயல்படுகின்றன.
பயர்பாக்ஸ் 3.7 அடுத்த 2010 ஆம் ஆண்டின் நடுவிலும், பதிப்பு 4 அடுத்து ஒரு ஆண்டிலும் வெளியாகும் என அறிவிக்கப்பட்டுள்ளது. இவற்றில் அறிவிக்கப்பட்டதைக் காட்டிலும் கூடுதலாகப் புதிய வசதிகள் கிடைக்கும் என்று எதிர்பார்க்கப்படுகிறது.

பாதுகாப்பான கம்ப்யூட்டிங் வழிகள்

1. திடீர் திடீரென எழுந்து வரும் பாப் அப் விளம்பரங்களிலிருந்து பொருட்களை வாங்க முயற்சிக்க வேண்டாம். ஸ்பேம் மெயில்களில் வரும் விளம்பரங்கள் எல்லாம் வேறு எதற்கோ உங்களை மாட்ட வைத்திடும் விளம்பரங்களே.
2. உங்களுடைய இமெயில் முகவரி, இல்ல முகவரி, பேங்க் அக்கவுண்ட் எண், அதன் இணையதளத்தில் நீங்கள் பயன்படுத்தும் பெயர், பாஸ்வேர்ட் மட்டுமின்றி, உங்களுக்குத் தெரிந்த மற்றவர்களின் மேற்படி தகவல்களையும் வெப்சைட்டில் தரும் முன் பலமுறை யோசிக்கவும். உங்கள் பணம் சார்ந்த தகவல்களை தரவே வேண்டாம்.
3. மாதத்தின் ஒவ்வொரு இரண்டாவது செவ்வாய்க் கிழமையும் மைக்ரோசாப்ட் நிறுவனம் தன் வெப்சைட்டில் தரும் பேட்ச் பைல்களைக் கொண்டு, உங்கள் ஆப்பரேட்டிங் சிஸ்டத்தினை அப்டேட் செய்திட மறக்க வேண்டாம்.
4. ஆண்ட்டி வைரஸ் தொகுப்பு இன்ஸ்டால் செய்து இயக்காமல் இன்டர்நெட் தளங்களை பிரவுஸ் செய்திட வேண்டவே வேண்டாம். அண்மைக் காலத்திய அப்டேட் வரை பெற்ற பின்னரே,கம்ப்யூட்டரை ஸ்கேன் செய்திடவும்.
5. பயர்வால் ஒன்றை இன்ஸ்டால் செய்திடாமல் இன்டர்நெட் பிரவுசிங் மேற்கொள்ள வேண்டாம்.
6. மற்றவர்களின் கிரெடிட் கார்ட் எண், பேங்க் அக்கவுண்ட் எண் இவற்றைத் தெரிந்து கொள்ள முயற்சிக்க வேண்டாம். இது வீணான பழியையும் கொண்டு வந்து சேர்க்கும்.
7. இணையத்தில் உங்கள் பேங்க் அக்கவுண்ட் சார்ந்த தகவல்களைப் பயன்படுத்துகையில், அந்த தளம் தோன்றுகையில் டாஸ்க் பாரின் சிறிய பேட் லாக் போன்ற படம் தெரிந்தால் மட்டுமே தரவும். அல்லது அதன் முகவரியில் அந்த தளம் பாதுகாப்பானது என்பதற்கான அடையாளத்தைத் தேடவும். பெரும்பாலும் இதன் முகவரிகள் https: என எஸ் (s) என்ற எழுத்தையும் சேர்த்துக் கொண்டு தொடங்கும்.
8.நைஜீரியா அல்லது மற்ற பிரபலமாகாத நாடுகளின் பேங்கர்கள் அல்லது பிரதிநிதிகள் என்று சொல்லிக் கொண்டு உங்களுக்கு வரும் இமெயில்களைப் படிக்காமலேயே நீக்கிவிடுங்கள்.
9.இதனை பார்வேர்ட் செய்திடுங்கள் என்று வரும் மெயில்களை அலட்சியம் செய்துவிடுங்கள். உங்கள் நண்பர்கள் மற்றும் உறவினர்களுக்கு அனுப்பி கெட்ட பெயர் எடுக்காதீர்கள். எல்லாம் ஏமாற்றுவேலை.
10. உங்கள் மற்றும் உங்கள் குடும்ப உறுப்பினர்களின் பிறந்த நாள் மற்றும் முக்கிய நாட்களின் தேதிகளை பாஸ்வேர்டாகப் பயன்படுத்த வேண்டாம்.
இது என்ன பத்து கட்டளையா? என்று கேட்கிறீர்களா! இன்னமும் சில பாதுகாப்பிற்கான வழிகள் உள்ளன. ஆனால் குறைந்த பட்சம் இதனைப் பின்பற்றவும்.

எக்ஸெல் செல் செலக்ஷன்: புது வழிகள்

எக்ஸெல் ஒர்க் ஷீட்டில் வேலை செய்கையில் அடிக்கடி நாம் சில செல்களை காப்பி செய்து, பின் பல வேலைகளை மேற்கொள்வோம். சில செல்களை மொத்தமாக நீக்குவோம். காப்பி செய்வோம். மற்றவற்றை பேஸ்ட் செய்வோம். இப்படி பல வேலைகளைச் செய்வோம்.
பலமுறை நாம் செல்களைத் தேர்ந்தெடுத்த பின்னர், அடடா! தேர்ந்தெடுத்த செல்லுக்கு முன் உள்ள செல்லையும் சேர்த்துத் தேர்ந்தெடுத்திருக்கலாமே என்று எண்ணலாம். அப்படிப்பட்ட நெருக்கடியில் நாம் தேர்ந்தெடுத்த செல்களின் மேலாகவோ அல்லது வலது இடது புறமாகவோ செல்வரிசைகளைச் சாதாரணமாகக் கூடுதலாக இணைக்க முடியாது. இதற்கான வழி ஒன்றினை அண்மையில் காண நேர்ந்தது. அதனை இங்கு பார்ப்போம்.
ஒர்க்ஷீட் ஒன்றில் செல்களின் பல வரிசைகளைத் தேர்ந்தெடுக்கையில், ஷிப்ட் கீயை அழுத்திக் கொண்டு கர்சரைத் தேவையான செல்லில் வைத்து இழுத்து தேர்ந்தெடுக்கிறோம். C3 யிலிருந்து H12 வரை தேர்ந்தெடுக்கிறேன். பின் இந்த செலக்ஷனை B2 லிருந்தே செய்திருக்க வேண்டும் என எண்ணுகிறேன்.
இதற்கான புதிய வழி:
1.ஷிப்ட் கீயை அழுத்திக் கொண்டு செல்களைத் தேர்ந்தெடுக்க வேண்டும். இங்கு C3: H12 தேர்ந்தெடுக்கவும். தேர்ந்தெடுக்கப்பட்ட செல்கள் அனைத்தும், கலரால் ஷேட் செய்யப்பட்டிருக்கும் –– ஒரு செல்லைத் தவிர. அந்த செல் C3. இது மற்ற தேர்ந்தெடுக்கப்பட்ட செல்களைப் போல் இல்லாமல் வேறு ஒரு வண்ணத்தில் இருக்கும். பெரும்பாலும் வெள்ளையாக இருக்கும். இது நமக்கு தேர்ந்தெடுக்கப்பட்டதில் முதல் செல் C3 என்று சொல்கிறது. இதனை செலக்டட் செல் எனக் கூறுவார்கள்.
2. இனி ஷிப்ட் கீயை விட்டுவிட்டு, கண்ட்ரோல் + . (முற்றுப்புள்ளி) புள்ளியை இருமுறை அழுத்தவும். முதல் முறை அழுத்துகையில் வெள்ளைக் கலரில் இருந்த செலக்டட் செல் அடையாளம் தேர்ந்தெடுக்கப்பட்ட படுக்கை மேல் வரிசையின் வலது முனையில் இருக்கும் செல்லுக்கு – H3– மாறும். அடுத்து கீழாக உள்ள வலது முனை செல்லுக்கு – H12 – மாறும்.
3. இனி ஷிப்ட் கீயை அழுத்திக் கொண்டு மேல் நோக்கி உள்ள அம்புக் குறியை ஒரு முறை அழுத்துங்கள். அடுத்து கீழ் நோக்கி உள்ள அம்புக் குறியை ஒரு முறை அழுத்துங்கள். தேர்ந்தெடுக்கப்பட்ட செல்களின் இடம் மேல் இடது பக்கம் ஒரு வரிசை நீட்டிக்கப்படுவதைப் பார்க்கலாம். அதாவது செலக்டட் செல் எங்கிருக்கிறதோ, அதற்கு எதிர் உச்சியில் நீட்டிக்கப்படும்.
பார்த்தீர்களா! நீங்கள் ஏற்கனவே தேர்ந்தெடுத்த செல்களின் வரிசையை தொந்தரவு செய்திடாமல் செல் வரிசையை இணைக்க முடிகிறதே.
இதற்கு இன்னொரு அருமையான வழியும் உள்ளது. இந்த வழியில் ஒரு கீ அழுத்துவது குறைக்கப்படும். மேலே சொல்லப்பட்ட வழி 2ல் ஷிப்ட் கீயை விடாமல், டேப் கீ அழுத்தவும்.H12 உடன் செலக்டட் செல்லாக மாறும். இந்த வழியை வைத்துக் கொண்டு இன்னும் என்ன என்ன வேலைகளைச் செய்யலாம் என்று பார்க்கலாம். இந்த செலக்டட் ரேஞ்ச் விரிவாக்கம் அனைத்தும், செலக்டட் செல்லுக்கு குத்து எதிரே தான் நடக்கிறது என்பதை உணர்ந்து கொள்ள வேண்டும்.
செல் ரேஞ்ச் தேர்ந்தெடுத்துவிட்டு, பின் டேப் கீ அழுத்தினால் இடது புறம் இருந்து வலது புறமாக, மேலிருந்து கீழாக செலக்டட் செல் மாறுவதனைக் காணலாம். ஷிப்ட் + டேப் அழுத்தினால் இதற்கு நேர் மாறாக செல் தேர்ந்தெடுக்கப்படுவதனைக் காணலாம். இவ்வாறு பல்வேறு இடங்களில் செலக்டட் செல்லைக் கொண்டு வந்து செல் செலக்ஷனை நீட்டித்துப் பார்க்கவும்.

பைல்களை வாங்கிப் பாதுகாக்கும் “மீடியா பயர்’

போட்டோக்கள், ஆடியோ மற்றும் வீடியோ பைல்களைத் தொடர்ந்து சேகரித்து வருபவரா நீங்கள்! அப்படியானால் உங்கள் பெர்சனல் கம்ப்யூட்டரின் ஹார்ட் டிஸ்க் விரைவிலேயே என்னிடம் இடம் இல்லையப்பா என்று எச்சரிக்கை விடுக்கும். அவ்வளவும் கண்டு கேட்டு மகிழும் பைல்களே; என்ன செய்யலாம். சிடி / டிவிடிக்களை நம்பி காப்பி செய்து பயன்படுத்துவது வேலை கெட்ட வேலை ஆயிற்றே என்று புலம்புவரா நீங்கள். கூடுதலாக இன்னொரு ஹார்ட் டிஸ்க் வாங்கினால் என்ன என்று திட்டமிடலாம். ஆனால் உங்கள் கம்ப்யூட்டரில் அதனை ஏற்றுக் கொள்ளக் கூடிய இடம் வேண்டும். மேலும் பணச் செலவு ஆகுமே? இப்படிக் கவலைப் படுபவரா நீங்கள்? அப்படியானால் நீங்கள் நிச்சயம் மீடியா பயர் குறித்துத் தெரிந்து கொள்ள வேண்டும்.

மீடியா பயர் ஆன் லைனில் எவ்வளவு பைல்களை வேண்டுமானாலும் பதிந்து வைத்துப் பயன்படுத்தும் வசதியினை அளிக்கிறது. அதுவும் இலவசமாக! இதனை தனிப்பட்ட உபயோகத்திற்கு மட்டுமின்றி உங்கள் நிறுவனங்களின் தேவைகளுக்கும் பயன்படுத்தலாம்.

www.mediafire.com என்ற முகவரியில் உள்ள தளத்திற்கு முதலில் செல்லுங்கள். இந்த தளத்தில் நுழைந்தவுடன் அதன் முகப்பு பக்கத்தின் நடுவில் ஒரு பட்டன் இருப்பதைக் காணலாம். அதில் “Upload files to MediaFire” என்று இருக்கும். அதில் கிளிக் செய்திடுங்கள். அப்போது திறக்கப்படும் பக்கத்தில் அடுத்தடுத்து மூன்று பட்டன்கள் தரப்படும். நீங்கள் காத்திட விரும்பும் பைல்களை இரண்டு வகைகளில் அப்லோட் செய்திடலாம். உங்களுக்கென ஓர் அக்கவுண்ட் திறந்து அப்லோட் செய்திடலாம். அல்லது எந்த அக்கவுண்ட்டும் இன்றி நேரடியாக பைல்களை அப்லோட் செய்திடலாம். அக்கவுண்ட் இல்லாமல் பைல்களை அப்லோட் செய்தால் அந்த பைல்களை நீங்கள் படிக்கலாம்; பார்க்கலாம். ஆனால் எடிட் செய்திட முடியாது. அவற்றை மீடியா பயர் தளத்திலிருந்தும் நீக்க முடியாது. இருப்பினும் இவ்வாறு மீடியா பயரில் சேவ் செய்திடும் பைலுக்கு உங்களுக்கென ஒரு லிங்க் தரப்படும். இதனைக் கிளிக் செய்து உங்கள் பைலை நீங்கள் பார்க்கலாம். உங்கள் நண்பர்களுக்கு அந்த லிங்க்கைக் கொடுத்து அவர்களையும் பார்க்குமாறு செய்திடலாம். பைல்களை மீடியா பயர் தளத்தில் ஏற்றிய பின்னர் எந்த நேரத்திலும் அந்த தளம் சென்று “MyFiles”பிரிவு சென்று நீங்கள் வைத்துள்ள பைல்களைப் பார்த்து படிக்கலாம்.

உங்களுக்கென தனி அக்கவுண்ட் திறப்பதுவும் மிகவும் எளிதுதான். மீடியா பயர் கேட்கும் உங்கள் மின்னஞ்சல் முகவரியினைத் தந்துவிட்டு ஏதேனும் ஒரு பாஸ்வேர்டைத் தர வேண்டும். உங்களுக்கென ஓர் அக்கவுண்ட் திறக்கப்படும். இனி உங்கள் பெர்சனல் அக்கவுண்ட் பயன்படுத்தி நீங்கள் பைல்களை மீடியா பயர் தளத்தில் பதிந்து, பதுக்கி வைக்கலாம்.

பைல்களை அப்லோட் செய்திட “Upload files to MediaFire” என்ற இடத்தில் கிளிக் செய்திடவும். உடனே விண்டோஸ் எக்ஸ்புளோரர் விண்டோ போல ஒரு விண்டோ கொடுக்கப்படும். உங்கள் கம்ப்யூட்டரில் உள்ள அனைத்து பைல்களையும் இந்த விண்டோ மூலம் பார்க்கலாம். நீங்கள் அப்லோட் செய்திட விரும்பும் அனைத்து பைல்களையும் தேர்ந்தெடுத்து அப்லோட் செய்திடலாம். எத்தனை பைல்களை வேண்டுமானாலும் அப்லோட் செய்திடலாம். ஆனால் பைல் ஒன்றின் அளவு 2 ஜிபி க்கு மேல் இருக்கக் கூடாது.

பைல்களை செலக்ட் செய்தவுடன் “Upload” என்ற பட்டனில் கிளிக் செய்திடவும். மீண்டும் விண்டோ ஒன்று புதியதாகத் திறக்கப்படும். இங்கு நீங்கள் மீடியா பயரில் பதிந்து வைக்கும் பைல்களுக்குப் புதியதாக ஒரு போல்டர் தயாரிக்கலாம். அல்லது அது தரும் மை பைல் என்ற போல்டரையே பயன்படுத்தலாம். எப்போது வேண்டுமானாலும் இந்த போல்டரில் உள்ள பைலை நீங்கள் பார்வையிடலாம். பைல் ஒன்று உங்களுக்கு மட்டுமான பிரைவேட் பைலா அல்லது உங்கள் நண்பர்களும் பார்க்கக் கூடியதான பப்ளிக் பைலா என்பதனையும் நீங்களே முடிவு செய்து அந்த அட்ரிபியூட்டை பைலுக்குக் கொடுக்கலாம்.

நீங்கள் உங்கள் அக்கவுண்ட்டின் பாஸ்வேர்டை மாற்ற வேண்டும் என எண்ணினால் உடனே மை அக்கவுண்ட் தேர்ந்தெடுத்தால் அங்கு அதற்கான வசதி கிடைக்கும். இங்கேயே உங்களுடைய முக்கியமான பைல்களுக்குமான பாஸ்வேர்டையும் உருவாக்கலாம். எங்கள் நிறுவன பைல்கள் எல்லாமே 4 ஜிபிக்கு மேலாகவே இருக்கின்றன. என்ன செய்யலாம்? என்று ஒரு சிலர் எண்ணலாம். மீடியா பயர் அதற்கும் வழி தருகிறது. கட்டணம் செலுத்தி அந்த வசதியைப் பெறலாம்.

உலக வரைபடத்தில் உங்கள் ஊரின் இடம், நேரம்

உலகின் எந்த மூலையிலும் உள்ள ஊர்களின் அப்போதைய நேரம், உலக வரை படத்தில் அதன் இடம், அந்த ஊரின் அட்ச ரேகை, தீர்க்க ரேகை, எந்த நாடு என அனைத்து தகவல்களையும் மிகக் குறைந்த நேரத்தில் காட்டும் இணைய தளம் ஒன்றைப் பார்க்க நேர்ந்தது. உசிலம்பட்டியில் இருந்து ஒரு வாசகர், அவர் ஊரின் அட்சரேகை, தீர்க்க ரேகையினை உடனே அறிவதற்கான இணைய தளம் உள்ளதா என்று கேட்டு கடிதம் எழுதியிருந்தார். அவருக்கான ஆசையினை நிறைவேற்றும் இணைய தளத்திற்காகத் தேடிய போது இந்த தளம் கிடைக்கப் பெற்றது. http://worldtimeengine.com/about என்ற முகவரியில் உள்ள தளம் தரும் தகவல்கள் வியப்பைத் தருகின்றன.
ஒரே நேரத்தில் நீங்கள் மூன்று வெவ்வேறு கண்டங்களில் இருக்கின்ற ஊரின் நேரத்தை அறியலாம்.எடுத்துக் காட்டாக சென்னை,லண்டன்,மாஸ்கோ (Chennai and London and Moscow) எனக் கொடுத்து நேரம் அறிய எணி என்ற பட்டனை அழுத்த வேண்டியதுதான். உடனே இந்த மூன்று ஊர்களின் சாட்டலைட் படம் மேப்பாகக் காட்டப்படுகிறது. நீங்கள் கேட்கும் ஊரின் மேலாக அடையாளம் காட்டப்படுகிறது. படத்திற்கு மேலாக ஊர் பெயர், ஊர் உள்ள நாடு, அது காலையா அல்லது மாலையா, இரவா எனக் காட்டி அப்போதைய நேரம், கிழமை மற்றும் தேதி காட்டப்படுகிறது. கீழாக சாட்டலைட் மேப் தரப்படுகிறது. மேப்பில் அந்த ஊரின் மற்றும் சுற்றி உள்ள ஊர்களின் சீதோஷ்ண நிலை காட்டப்படுகிறது. வழக்கம்போல் கூகுள் மேப்பில் ஸூம் செய்வது போல இதனையும் ஸூம் செய்து காணலாம். மூன்று வகை மேப்பினையும் காணலாம்.

இது பன்னாட்டளவில் பல ஊர்களுக்கு தொலைபேசி அல்லது இன்டர்நெட் மூலம் தொடர்பு கொள்பவர்களுக்கு அந்த ஊர்களின் அப்போதைய நேரத்தைத் தெரிந்து செயல்பட உதவும். சரி, விஷயத்திற்கு வரவும். உசிலம்பட்டி என்ற ஊரின் அட்சரேகை, தீர்க்க ரேகை என்ன என்று சொல்லவில்லையே என்று திட்டாதீர்கள்.
இதோ அவை: Latitude (அட்சரேகை): 9.9689450 degrees, Longitude (தீர்க்க ரேகை) 77.7876820 degrees. நீங்களும் உங்கள் ஊரின் ரேகைகளைப் பற்றித் தெரிந்து வைத்துக் கொள்ளுங்கள்.

ஜஸ்ட் ரிலாக்ஸ்

கம்ப்யூட்டர் இயங்கிக் கொண்டிருக்கிறதா? எக்ஸெல் மற்றும் வேர்ட் என வேலை பார்த்து உற்சாகம் குறைகிறதா?
இதோ ஓர் அதிர்ச்சி டானிக்.
1. கண்ட்ரோல் + ஆல்ட் + மேல் அம்புக் குறி அழுத்தவும்.
என்ன ஒன்றும் ஆகவில்லையா! பொறுங்கள். அடுத்து
2. கண்ட்ரோல் + ஆல்ட் + வலது அம்புக் குறி அழுத்தவும்.
அய்யோ இது என்ன! மானிட்டர் அப்படியேஇருக்க உள்ளே ஸ்கிரீன் மட்டும் திசை மாறித் தொங்குகிறதே எனப் பதற வேண்டாம்.
3. அடுத்து கண்ட்ரோல் + ஆல்ட் + இடது அம்புக் குறி அழுத்துங்கள். இப்போது ஸ்கிரீன் இன்னொரு பக்கத்தில் முறைத்துக் கொண்டு தொங்குகிறதா!
4. மீண்டும் கண்ட்ரோல்+ ஆல்ட்+ கீழ் அம்புக்குறி, அதன் பின் இதே சேர்க்கையில் மேல் அம்புக்குறி என அழுத்துங்கள்.
உங்கள் திரை பழையபடி ஆகிவிட்டதா!
என்ன! மறுபடியும் தைரியமாய் விளையாடப் போகிறீர்களா!
அதான் கம்ப்யூட்டர். என்ன செய்தாலும் ஒன்றும் கெட்டுப் போகாது.

எக்ஸெல் + கண்ட்ரோல் – எக்ஸெல் டிப்ஸ்… டிப்ஸ்…

எக்ஸெல் தொகுப்பில் கண்ட்ரோல் கீகள் மற்ற கீகளுடன் இணைந்து, ஷார்ட் கட் கீ தொகுப்பாக என்ன செயல்பாட்டினைத் தரும் என்பதனைப் பார்க்கலாம்.
Ctrl+A: அனைத்தையும் தேர்ந்தெடுக்கும்
Ctrl+B: எழுத்துக்களை போல்ட் (அழுத்தமானதாக) ஆக மாற்றும்
Ctrl+C: தேர்ந்தெடுத்ததனை காப்பி செய்திடும்
Ctrl+D: செல்லில் நிரப்பும் பில் கட்டளைக்கு
Ctrl+F: ஏதேனும் ஒன்றைத் தேடிக் கண்டுபிடிக்கும் பைண்ட் செயல்பாடு
Ctrl+G: கோ டு (Go To) கட்டம் கிடைக்கும்.
Ctrl+H: ரீபிளேஸ் என்ற கட்டளைக்கான கீகள்
Ctrl+I: தேர்ந்தெடுக்கப்பட்ட சொற்களை இடாலிக் எனப்படும் சாய்வாக மாற்றும்
Ctrl+K: ஹைப்பர்லிங்க் இடைச் செருகும்
Ctrl+N: புதிய ஒர்க் புக்கைக் கொண்டு வரும்
Ctrl+O: புதிய பைலைத் திறப்பதற்கான கீகள்
Ctrl+P: பிரிண்ட் கொடுப்பதற்கான கட்டளை தர
Ctrl+R: பில் ரைட் (Fill right) கட்டளை: இடது பக்கம் இருக்கும் செல்லின் மதிப்பை அப்படியே வலது புறமாக பில் அப் செய்திடும்.
Ctrl+S: பைலை சேவ் செய்திடும்
Ctrl+U: தேர்ந்தெடுத்த டேட்டாவின் கீழே கோடு அமைக்க
Ctrl+W: பைலை மூட
Ctrl+X: கட் கட்டளை; தேர்ந்தெடுத்த சொல்லை நீக்கி கிளிப் போர்டு கொண்டு செல்ல
Ctrl+Y: அப்போது நீக்கியதை மீண்டும் கொண்டு வர
Ctrl+Z: முன் செய்த செயலின் விளைவுகளை நீக்கி, முந்தைய நிலைக்குக் கொண்டு வர
Ctrl+1: பார்மட் செல்ஸ் டயலாக் பாக்ஸ் கொண்டுவர
Ctrl+2: போல்ட் என்ற அழுத்தமாக டேட்டாவினை அமைக்க
Ctrl+3: இடாலிக் எனப்படும் சாய்வாக டேட்டா அமைக்க
Ctrl+4: அடிக்கோடிட
Ctrl+5: குறுக்காக கோடிட
Ctrl+6: ஆப்ஜெக்ட் மறைக்கவும், காட்டவும் மேற்கொள்ளக் கூடிய டாகிள் கீ
Ctrl+7: ஸ்டாண்டர்ட் டூல் பாரினைக் காட்டவும், மறைக்கவும்
Ctrl+8: அவுட்லைன் அடையாளங்களைக் கொண்டுவர, மறைக்க
Ctrl+9: படுக்கை வரிசைகளை (Rows) மறைக்க
Ctrl+10: நெட்டு வரிசைகளை (Columns) மறைக்க
Ctrl+Shft+(: மறைத்த படுக்கை வரிசைகளை (Rows) மீண்டும் காட்ட
Ctrl+Shft+): மறைத்த நெட்டு வரிசைகளை (Columns) மீண்டும் காட்ட

எப்போதும் நினைவில் கொள்ள :
வலமிருந்து இடமாக ஒவ்வொரு செல்லாகச் செல்ல Tab தட்டவும்.
மேலும் கீழுமாகச் செல்களுக்குச் செல்ல Enter அழுத்தவும்.
Backspace அழுத்தினால் அப்போது உள்ள செல்லில் காணப்படும் தகவல்கள் அழிக்கப்படும்.
நீங்கள் இருக்கும் வரிசையில் முதல் இடத்திற்குச் செல்ல Home அழுத்தவும்.
Ctrl + ; (செமிகோலன்) கீகளை அழுத்த சிஸ்டத்தில் உள்ள அன்றைய தேதி பதியப்படும்.
Ctrl + Shift + : (கோலன்) கீகளை அழுத்த அப்போதைய சிஸ்டம் நேரம் பதியப்படும்.
ஒரு பார்முலாவைத் தொடங்க = (equal sign) அழுத்தவும்.
F7– செல்லில் உள்ள தலைப்பு மற்றும் சொற்களில் ஸ்பெல்லிங் பிழைகள் உள்ளதா என அறிய F7அழுத்தவும்.
அச்சில் செல்லை கட்டம் கட்ட எக்ஸெல் தொகுப்பில் ஒர்க் ஷீட்டைப் பிரிண்ட் எடுக்கையில் செல்களில் உள்ள டேட்டாவினைச் சுற்றி உள்ள கட்டமும் அச்சிடப்பட வேண்டும் என எண்ணுகிறீர்களா! கீழே கொடுத்துள்ளபடி செட் செய்தால் கட்டம் அச்சாகும்.
எங்கெல்லாம் செல்களைச் சுற்றிலும் மற்றும் குறுக்காகவும் பார்டர் வர வேண்டும் என திட்டமிடுகிறோமோ, அவற்றை முதலில் தேர்ந்தெடுக்க வேண்டும். பின் அதன்மீது கர்சரை வைத்து ரைட் கிளிக் செய்திடவும். விரியும் மெனுவில் Format Cells என்பதில் கிளிக் செய்தால் கிடைக்கும் விண்டோவில் எப்படி எல்லாம் கோடுகள் வேண்டும் என்பதற்கேற்ப ஆப்ஷன் தேர்ந்தெடுத்து ஓகே கிளிக் செய்து வெளியேற வேண்டும். அச்சில் கோடுகள் அதன்பின் கிடைக்கும்.

எக்ஸெல் இன்ஸெர்ட் பங்சன்:
எக்ஸெல் தொகுப்பில் ஏதேனும் ஒரு செல்லில் Formula ஒன்றை அமைக்க வேண்டும் என்றால் பார்முலாவினை டைப் செய்திடாமல் அதற்கான Insert பங்சனைக் கையாளலாம். மெனு பார் சென்று அதில் Insert அழுத்திக் கிடைக்கும் மெனுவில் Function பிரிவைக் கிளிக் செய்தால் காட்டப்படும் விண்டோவில் தேவையான பார்முலாவினையும் செல்களையும் தேர்ந்தெடுக்கலாம். இதனை கீ போர்டிலிருந்து கையெடுத்து மவுஸை இங்கும் அங்கும் நகர்த்தி இந்த பணியினை மேற்கொள்கிறோம். அதற்குப் பதிலாக கர்சரைச் சம்பந்தப்பட்ட செல்லில் வைத்துவிட்டு Shift+F3 கீகளை அழுத்தினால் போதும். இன்ஸெர்ட் பங்சன் விண்டோ கிடைக்கும்.

வரிசைகளை மொத்தமாகத் தேர்ந்தெடுக்க எக்ஸெல் தொகுப்பில் நெட்டு வரிசை மற்றும் படுக்கை வரிசைகளை (Column, Row) முழுமையாகத் தேர்ந்தெடுக்க அந்த வரிசையில் கர்சரை வைத்து கீழாகவோ அல்லது பக்க வாட்டிலோ கர்சரை இழுத்து ஹைலைட் செய்கிறீர்கள் அல்லவா? இந்த இழுபறி வேலையை இரண்டு கீகள் எளிதாக்குகின்றன. எந்த நெட்டுவரிசையினை (Column) ஹைலைட் செய்திட வேண்டுமோ அல்லது தேர்ந்தெடுக்க வேண்டுமோ அதில் உள்ள செல்கள் ஒன்றில் கர்சரை வைத்துப் பின் கண்ட்ரோல் கீயுடன் ஸ்பேஸ் பாரினை (Ctrl + Spacebar) அழுத்தவும். இப்போது அனைத்து செல்களும் தேர்ந்தெடுக்கப்படும். இதே போல படுக்கை வரிசையில் ஹைலைட் செய்திட Shift + Spacebar அழுத்தவும்.

கீ போர்டைப் பாருங்கள்
நாம் வேகமாக டைப் செய்திடுகையில் சில வேளைகளில் அனைத்து எழுத்துகளும் தவறாக டைப் செய்யப்படும். காரணம்? கீ போர்டில் நம் விரல்கள் வழக்கமாக இல்லாமல் ஒரு கீ இடது பக்கமோ, வலது பக்கமோ தள்ளி இருக்கலாம். இதனைத் தவிர்த்து, எப்போதும் சரியாக இருக்க, உங்கள் கீ போர்டில் ஒரு வழி தரப்பட்டுள்ளது. கீ போர்டில் உள்ள ஜே மற்றும் எப் எழுத்துக்கான கீகளைப் பார்த்து இரண்டு ஆட்காட்டி விரல்களாலும் ஸ்பரிசித்துப் பாருங்கள். சிறிய மேடு ஒன்று இரண்டிலும் தட்டுப்படுகிறதா? வேகமாக டைப் செய்பவர்கள் மற்றும் முறையாக டைப் ரைட்டிங் கற்றுக் கொண்டவர்கள் மானிட்டரைப் பார்த்துத்தான் டைப் செய்திடுவார்கள். இவர்கள் கீ போர்டில் விரல்களைச் சரியான கீகளில் வைத்துத்தான் தாங்கள் டைப் செய்கிறோம் என்பதனைக் கீ போர்டைப் பார்க்காமலேயே உணர்ந்து கொள்ள இந்த இரண்டு கீகளிலும் சிறிய மேடு தரப்பட்டுள்ளது. இதை இரண்டு ஆட்காட்டி விரல்களும் உணர்ந்தால் உங்கள் விரல்கள் சரியான முறையில் கீகளைத் தொட்டுக் கொண்டிருக்கின்றன என்று பொருள்.